Frikë për cunami pas tërmetit të fuqishëm në Zelandën e Re, çahet toka

Një tërmet i fortë me magnitudë 6.7 goditi ishullin Jugor të Zelandës së Re të martën, thanë autoritetet atje ndërsa në fotot e postuara shihet toka e çarë pas lëkundjeve të forta.

Agjencia Kombëtare e Menaxhimit të Emergjencave tha se banorët e rajoneve Southland dhe Fiordland duhet të qëndrojnë larg plazheve dhe zonave detare pasi rrymat e forta dhe të pazakonta mund të paraqesin rrezik.

“Në këto zona mund të jetë krijuar një cunami dhe mund të arrijë shpejt, kështu që evakuoni menjëherë në lartësinë më të afërt, jashtë të gjitha zonave të evakuimit të cunamit ose sa më larg që të jetë e mundur në brendësi të tokës. Rreziku i rrymave të pazakonta pritet të zvogëlohet në mbrëmjen e së martës. Një matës bregdetar i nivelit të detit raportohet se regjistroi një cunami 10 cm i cili zgjati për 90 minuta pas tërmetit në jugperëndim të Fiordland, në skajin jugperëndimor të ishullit jugor. Tërmeti goditi afër kufirit të pllakës tektonike ku pllaka australiane gërvishtet nën pllakën e Paqësorit në një zonë të njohur si Hendeku Puysegur”, thuhet në njoftimin e autoriteteve.

Më shumë se 4,700 njerëz e ndjenë tërmetin, tha monitoruesi sizmik qeveritar Geonet, ndërsa mediat e Zelandës së Re raportuan se sendet ranë dhe ndërtesat u lëkundën.

“Ne i i pamë gjërat që ranë nga rafti. Tavolina e jashtme prej druri kërcente,” postoi një përdorues në Facebook, sipas gazetës New Zealand Herald.

Tërmeti u raportua në një thellësi prej 33 km (21 milje) rreth 160 km në veri-perëndim të ishujve Snares, pjesa më veriore e ishujve nën-antarktik të Zelandës së Re, tha Geonet në një alarm.

Shërbimi Gjeologjik i Shteteve të Bashkuara tha se tërmeti, i cili u zvogëlua nga një magnitudë e mëparshme prej 7 ballë, ndodhi në një thellësi prej rreth 10 km (6 milje).

Byroja kombëtare e motit të Australisë tha se nuk kishte asnjë kërcënim cunami për kontinentin, ishujt apo territoret.

Zelanda e Re shtrihet në “Unazën e Zjarrit” sizmikisht aktive, një hark 40,000 km vullkanesh dhe llogore oqeanike që rrethojnë pjesën më të madhe të Oqeanit Paqësor.

LEXONI GJITHASHTU:

• Një tërmet i fuqishëm godet Zelandën e Re, sa ishte magnituda
• Delfini me peshë mbi 400 kilogramë hidhet mbi varkën e peshkatarit në Zelandën e Re