Fushata zgjedhore, Rama kritika Bashës për grumbullimet, reagon PD

Mitingu elektoral i Partisë Demokratike në Fier ka sjellë reagimin e kryeministrit Edi Rama i cili ështët treguar kritik ndaj grumbullimit masiv të mbështetësve të kësaj force politike në një kohë që vendi është në pandemi.

Në profilin e vet në Facebook kreu i qeverisë ka postuar dy foto, në njërën nga të cilën shihet mitingu i PD dhe në tjetrën vaksinimi në sheshin ‘Skënderbej’.

“Dy botë – njëra lufton për të shpëtuar jetën e të gjithëve pa dallim, tjetra bën përsheshe me virus për politikë pa din e as iman…

Vazhdon vaksinimi masiv në gjithë Shqipërinë. Vazhdon paralelisht edhe infektimi masiv, për vete hipur mbi makinë, nën këmbë ta hajë kush ta hajë”, shkruan kreu i qeverisë.

Menjëherë ka reaguar Partia Demokratike, që e cilëson veprimin e kryeministrit frikë nga qytetarët që kërkojnë ndryshimin.

“Ka vetëm dy mundësi: një lider që punon për ju, për të sjellë ndryshimin që i nevojitet Shqipërisë, për t’i përmirësuar jetët tona, ose Rama i cili dështoi për 8 vite dhe ua dha Shqipërinë oligarkëve.

Më 25 prill, Shqipëria do të fitojë dhe Rama do të humbë!” thuhet në reagimin e PD.