Gara me kohën për nëndetësen e miliarderëve, edhe 2 orë oksigjen për “Titan”

Ekipet e shpëtimit kanë shtuar numrin e anijeve që do të kontrollojnë në oqeanin Atlantik për nëndetësen e cila u nis drejt rrënojave të Titanikut.

Ata po përballen me një garë me kohën pasi furnizimi me oksigjen pritet të mbarojë deri në orën 13:00, me orën e Mbretërisë së Bashkuar të enjten, siç konfirmohet për The Independent nga Roja Bregdetare e SHBA.

Edhe ata që ishin optimistë, tani paralajmërojnë për shumë pengesa të mbetura – përcaktimi i vendndodhjes së nëndetëses, arritja e saj me pajisje shpëtimi, tërheqja e saj në sipërfaqe dhe e gjithë kjo, para se të mbarojë furnizimi me oksigjen.

Nëndetësja u raportua e zhdukur të dielën pasi humbi kontaktin një orë e 45 minuta, pasi u zhyt dhe nuk u kthye në sipërfaqe në kohën e parashikuar.

Roja Bregdetare e SHBA-së, në koordinim me agjencitë e tjera, përfshirë Marinën e SHBA-së dhe Rojet Bregdetare Kanadeze po punon në luftë me kohën, në përpjekje për të gjetur nëndetësen e zhdukur me pesë persona në bord, por deri më tani përpjekjet e kërkimit nuk kanë dhënë asnjë rezultat.

LEXONI GJITHASHTU:

• Tinguj nga nëndetësja e zhdukur 3800 metra në thellësi të Atlantikut
• Pamjet nga brenda nëndetëses së zhdukur, ndriçim i ulët dhe pak vend për të lëvizur