Gara për primaret e Tiranë, 7 kandidatët shpalosin platformat përballë demokratëve

Pasi u çertifikuan nga kryesia e Partisë Demokratike, të 7 kandidatët në primare për bashkinë e Tiranës, këtë fundjavë kanë nisur takimet e përbashkëta prezantuese përballë strukturave të demokratëve.

Të gjithë kandidatëve, Belind Këlliçi, Ilir Alimehmeti, Julian Deda, Gerti Bogdani, Adriana Kalaja, Enkelejda Fejzo dhe Fatmir Merkoçi iu ofrohet minutazh i barabartë për të shpalosur platformën që kanë për të përfaqësuar opozitën në garën e 14 majit përballë maxhorancës socialiste.

Këto takime të përbashkëta organizohen nga strukturat e Partisë Demokratike dhe vijnë pas fushatës personale që kandidatët kanë bërë gjatë 3 javëve të fundit pasi kanë shpallur futjen në garë.

Demokratët që kanë një kartë anëtarësimi ose ata që janë regjistruar si simpatizantë do të kenë mundësi të votojnë më 4 dhjetor për njërin mes kandidatëve. Nëse asnjëri prej tyre nuk do mund të marrë më tepër se 50% të votave, atëherë dy më të votuarit do të përballen në balotazh.

Procesi i primareve nuk mundi t’i bënte bashkë të gjithë demokratët. Dy palët dështuan në negociatat që nisën rreth 3 javë me parë, me grupin e Alibeajt që pas një mbledhje deklaroi se do të dalë me kandidatë të tjerë veçmas në zgjedhjet lokale të 14 majit.

LEXONI GJITHASHTU: 

• Lefter Maliqi, kandidati i parë i Partisë së Lirisë që do kandidojë në primaret e PD
• Agron Loka kandidat për primaret e Krujës