Gazetari Ferhati: Edhe për Lleshajn thuhet se ia kërkuan shkarkimin, s’ishte dorëheqje

Gazetari Eni Ferhati është i mendimit se Drejtorit të Përgjithshëm të Policisë, Ardi Veliu i është kërkuar dorëheqja. Ai madje kujton se informacione për një kërkesë të ngjashme dorëheqjeje ka pasur edhe për ish-ministrin e Brendshëm, Sandër Lleshaj.

Duke diskutuar largimin e Veliut në emisionin “Now” me Erla Mëhillin, gazetari i Euronews Albania, kujtoi se ai ka pasur marrëdhënie të tensionuara me ish-ministrin Lleshaj.

“[…] Veliu dihet që ka pasur marrëdhënie të tensionuara edhe me Zotin Sandër Lleshaj në krye të Policisë së Shtetit për disa çështje, përfshirë këtu edhe aksionet për largimin e banorëve [në protesta] te Unaza, për të cilat çuditërishtj u bë kurban Drejtori i Policisë së Tiranës, ku u gjet një arsye tjetër për ta lëvizur sepse ai nuk pranonte të binte pre e veprimeve arbitrare,” tha Ferhati.

“Edhe për Zotin Lleshaj ka pasur informacione që ai nuk ka paraqitur dorëheqjen, por është detyruar […] por këto informacione mbeten gjithmonë me [pak] burime, apo të dyshuara, pasi asnjëherë nuk mësohet [fiks] e vërteta për prapaskenat dhe raportet që ka Kryeministri me ministrat apo me Drejtorin e Policisë,” vijoi gazetari.

Sipas Ferhatit fati i Veliut ishte përcaktuar që pas konfirmimit si ministër i Brendshëm të Bledi Çuçit, që sipas gazetarit ka pasur si kusht për vijimin e detyrës pikërisht largimin e tij.

Ferhati tha se kishte dijeni për një përpjekje për të gjetur gjuhën e përbashkët mes ministrit dhe tashmë ish-Drejtorit të Përgjithshëm të Policisë, por kjo nuk është arritur.

Lleshaj u dorëhoq më 10 dhjetor 2020, dy ditë pasi polici Nevaldo Hajdaraj vrau Klodian Rashën dhe në Tiranë kishin nisur protestat.

Ish-gjenerali qe emëruar ministër më 28 nëntor 2018, pas largimit të Fatmir Xhafajt. Ai e gjeti Veliun në detyrë, pasi ky qe emëruar Drejtor Policie pikërisht nga Xhafaj.