Gazetari Julian Kasapi tregon detaje për ngjarjen ku u vra nënkomisari i Policisë

Gazetari Julian Kasapi ka treguar detaje të reja në lidhje me ngjarjen e sotme ku mbeti i vrarë nënkomisari i Policisë Saimir Hoxha.

Ai thotë se dy shokët e autorit, Kristjan Sherri dhe Armando Marku kanë pohuar para oficerit të policisë gjyqësore se nuk kishin dijeni që Aldi Rama ishte i armatosur.

Sipas gazetarit, të rinjtë pasi janë dorëzuar në polici kanë thënë se kishin dalë në atë zonë për të pirë cigare hashashi.

“Dy personat, dy miqtë e autorit kanë thënë se ne nuk e dinim se kishte armë dhe kishim dalë në atë zonë për të pirë cigare hashashi”, tha ai në studion e “Now”.

Në lidhje me veprimet e policisë, gazetari thotë se ato po ktheheshin rrugës pasi kishin identifikuar nëpërmjet dronit parcelën me 110 rrënjë kanabis.

“Ndërkohë sa i takon veprimit të policisë, ata po ktheheshin pasi kishin identifikuar nëpërmjet dronit parcelën me 110 rrënjë kanabis. Është evidentuar parcela dhe efektivët kanë parë një automjet të dyshimtë dhe e kanë ndaluar dhe nuk është se efektivët do futeshin në parcelë për të bërë korrje dhe për të djegur rrënjat e kanabisit. Dhe kanë ndaluar këtë automjete dhe aty ka ndodhur ngjarja”, tha ai.