Gazprom rikthen eksportet e gazit në Itali

Gjiganti rus i energjisë, Gazprom, ka thënë të mërkurën se do të rikthejë eksportet e gazit përmes Austrisë, kryesisht në Itali.

Kompania ka vendosur të rikthejë furnizimet pas pezullimit të tyre në fundjavë, duke cituar disa sfida me rregullatorët.

Gazprom ka thënë se vetë ajo dhe konsumatorët italianë, kanë gjetur zgjidhje për shitjen e gazit pas disa ndryshimeve në rregulloren e Austrisë.

Kompania e kontrolluar nga Kremlini, ka njoftuar të shtunën për pezullim të eksportit të gazit përmes Austrisë, pasi një operator i rrjetit nuk i ka dhënë Gazpromit konfirmim për transport, raporton Radio Evropa e Lirë.

Qeveria e Austrisë ka thënë se Gazpromi nuk i ka nënshkruar kontratat e nevojshme.

Sasia e gazit rus që hyn në Itali tani përbën 10 përqind të importit total të shtetit, në krahasim me 40 përqind, vite më parë, ka thënë për agjencinë e lajmeve Reuters një burim.

Sipas tij, Italia ka rritur sasinë e gazit që importon nga Algjeria dhe vendet nordike.

Gazprom ka zvogëluar në mënyrë të konsiderueshme sasinë e gazit që çon në Bashkimin Evropian, duke përmendur nevojën e punimeve në gazsjellës.

LEXONI GJITHASHTU:

• Gazprom kërcënon Gjermaninë se do ta lërë pa gaz