“Gëzim! Nuk kam fjalë”, Kadare flet për Euronews pas nominimit për The Booker Prize

“Gëzim! nuk ka fjalë tjetër”, kështu u përgjigj shkrimtari Ismail Kadare i pyetur nga pedagogia Elsa Skënderi Rakipllari se si ndihet që libri i tij, “Kur Sunduesit Grinden” është shpallur kandidat për çmimin “The Booker 2024”.

“Gëzim, nuk ka fjalë tjetër! nuk ka fjalë tjetër, çdo autor e mirëpret një vlerësim të tillë. Është një rol i rëndësishëm i çdo vepre i çdo shkrimtari në çdo gjuhë të botës. I bën nder shkrimtarit, gjuhës, vendit nga përkthehet. Çdo njohje e re në çdo gjuhë ndihmon edhe gjuhët e tjera që ta marrin e ta afrojnë një autor”,-tha Kadare për Euronews Albania.

Libri i botuar në vitin 2018 në Shqipëri, sjell një qasje mbi raportin e shkrimtarëve me diktatorët. Kadare rrëfen telefonatën e diskutuar gjatë, të një shkrimtari në ish-Bashkimin Sovjetik me Stalinin që në një moment do ta përdorte këtë telefonatë kundër vetë shkrimtarit.

Juria që vlerësoi librin dhe e renditi mes librave të përzgjedhur në garë, e cilësoi këtë roman një meditim magjepsës mbi Rusinë Sovjetike, autoritarizmin, strukturat e pushtetit dhe një periudhë shkrimtarësh të mëdhenj.

LEXONI GJITHASHTU:

• 88-vjetori i Ismail Kadaresë. Shtëpia bëhet qendër transmetimi për filma
• ‘Kur Sunduesit Grinden’, libri i Kadaresë kandidat për çmimin ‘The Booker 2024’