Giuliani shpall falimentin/Lëvizja, pas gjobës 148 milionë $ të vendosur nga gjykata

Ish-kryetari i Bashkisë së Nju Jorkut, Rudy Giuliani, një bashkëpunëtor i hershëm i presidentit Donald Trump, ka shpallur falimentin vetëm pak ditë pasi u urdhërua të paguante 148 milionë dollarë për shpifje.

Ai u urdhërua të paguante shumën në fjalë pasi një gjyqtar konstatoi se kishte shpifur në dëm të dy punonjëseve elektoral të shtetit të Xhorxhias, se kishin ndërhyrë në zgjedhjet e 2020-s.

Lëvizja e fundit e Giulianit tregon se ai ka miliona dollarë detyrime për çështje ligjore dhe taksa të papaguara. Një zëdhënës i tij tha se lëvizja nuk duhet të habisë askënd.

Në një deklaratë, përfaqësuesi i ish-kryetarit të Bashkisë së Nju Jorkut, Ted Goodman tha se, askush nuk e ka besuar se klienti i tij mund të paguajë një shumë kaq të madhe.

Ai shtoi se shpallja e falimentit do t’i japë zotit Giuliani shansin dhe kohën të ndjekë apelimin, si dhe të ofrojë një proces transparence për financat e tij nën mbikëqyrjen e gjykatës.

Giuliani, 79 vjeç, deklaroi më herët se ndodhej në vështirësi financiare për shkak të shpenzimeve ligjore.

Është e paqartë se si do të ndikojë deklarata e falimentimit në pagesat, por ligji i falimentimit në Shtetet e Bashkuara nuk lejon zgjidhjen e borxheve që rrjedhin nga “dëmtimi me dashje dhe me qëllim të keq” të shkaktuar ndaj një pale tjetër.

LEXONI GJITHASHTU:

• Ekstradimi nga SHBA i 60-vjeçarit, Balla: Askush s’mund t’i fshihet drejtësisë
• I dënuar me 12 vite burg për drogë, ekstradohet nga SHBA Albert Shkëmbi