GJKKO lë në fuqi dënimin për ish-kryebashkiakun e Hasit, Adem Lala

Gjykata e Posaçme e Apelit për Korrupsionin dhe Krimin e Organizuar ka lënë në fuqi vendimin e Gjykatës për Korrupsionin dhe Krimin e Organizuar për ish-kryetarin e Bashkisë Has, Adem Lala.

Ish-zyrtari lokal u dënua me 1 vit e 4 muaj burg, dënim që u konvertua në shërbim prove dhe 5 vite mos ushtrim të funksioneve publike. Më 24 shkurt të këtij viti, GJKKO gjeti fajtor z. Lala pas akuzave të SPAK për “shpërdorim detyre”.

Adem Lala u shpall fajtor për përfshirje në privatizimin në mënyrë të padrejtë të një prone publike të Bashkisë Has gjatë periudhës kur ushtronte detyrën.

I zgjedhur si përfaqësues i koalicionit PS-LSI, z. Lala ka drejtuar Hasin prej vitit 2015 deri në vitin 2019. Me profesion ish-ushtarak, ai ka qenë për dy mandate edhe kryetar i komunës Golaj, në Kukës.

Adem Lala është zyrtari i parë nga pushteti vendor që u mor në hetim nga SPAK. Çështja ndaj tij nisi fillimisht nga prokuroria e Kukësit e më pas iu transferua SPAK-ut, e cila më 18 qershor të vitit të kaluar e pati thirrur për të dhënë deklarime në lidhje me akuzat e ngritura.