Gjashtë të pandehur në gjyqin në Austri për sulmin terrorist të vitit 2020

Në Vjenë pritet të nisë një nga proceset më të shumëpritura gjyqësore në dy vitet e fundit.

6 persona do të ulen në bankën e të akuzuarve për lidhje me simpatizantin e Shtetit Islamik, që në vitin 2020 vrau 4 persona dhe plagosi 20 të tjerë në rrugët e kryeqytetit austriak, para se të qëllohej për vdekje nga policia. Avokatët e të pandehurve kanë të njëjtin mesazh.

“Klienti im ka qenë shok me agresorin, por do të deklarohet i pafajshëm pasi nuk kontribuoi kurrë në sulmin e armatosur. Vetëm pse ai i përket një besimi të caktuar nuk mund të konsiderohet fajtor”, tha Manfred Arbacher Stoeger, avokat mbrojtës.

6 personat dyshohen se ndihmuan ose influencuan agresorin teksa ai përgatit sulmin. Ata përballen me një seri akuzash, përfshirë atë të “pjesëmarrjes në krime terroriste”.

Vendimi nuk pritet të merret deri shkurtin e ardhshëm. Deri atëherë, dhjetëra dëshmitarë do të ndihmojnë në sqarimin e asaj që ndodhi natën e 2 nëntorit 2020, kur një radikal islamik doli rrugëve i armatosur deri në dhëmbë dhe hapi zjarr ndaj kujtdo që i dilte përpara, si dhe në rolin e 6 të dyshuarëve si bashkëpunëtorë.

LEXONI GJITHASHTU

• Parlamenti i Estonisë njeh Rusinë si sponsor shtetëror të terrorizmit
• Rusia e shpall ‘Metën’ organizatë terroriste
• ‘Raketat në Kiev u lëshuan nga Moska’, Putin: Kundërpërgjigje ndaj sulmit terrorist