Gjenerali famëkeq rus drejton luftën, bombardime në lindje të Ukrainës

Forcat ukrainase po përgatiten të përballen me betejën e radhës, pasi Rusia po rigrupon forcat e saj në lindje të vendit.

Kremlini shprehet se qëllimi i tij është çlirimi i rajonit të Donbas, dhe ky është objektivi i radhës i operacionit të tyre ushtarak.

Në një deklaratë të publikuar një ditë më parë, Ministria ruse e Mbrojtjes u shpreh se kishte kryer sulme në 86 njësi ushtarake, duke përfshirë edhe një qendër në qytetin lindor të Dnipro dhe duke goditur  edhe qytetin e dytë më të madh të Ukrainës Kharkiv.

Autoritetet ukrainase konfirmuan se aeroporti në Dnipro është shkatërruar.

Në kohen kur forcat ushtarake ruse po organizohen në lindje, qeveria ukrainase  bën thirrje që SHBA dhe aleatët të ndihmojnë me furnizimin me armë.

“Ne kemi kontrolluar çdo sistem armësh që kërkon Ukraina në renditje prioritare dhe kemi të tjera plane për t’i dorëzuar ato sa më shpejt që të jetë e mundur. Disa janë dorëzuar. Të tjerët janë në proces të dorëzimit. Dhe ne do të vazhdojmë të punojmë në mënyrë të shpejtë  për ti dhënë  Ukrainës atë që i nevojitet për të forcuar luftën e saj  në fushën e betejës dhe për të forcuar pozicionin  në tryezën e bisedimeve”, u shpreh Jake Sullivan, Këshilltar i sigurisë në SHBA.

Inteligjenca amerikane konfirmon se Rusia ka emëruar një komandant të ri në luftën me Ukrainën. Ai është një nga ushtarakët me më shumë përvojë në Rusi, gjeneral Alexander Dvornikov për të cilin thuhet se ka një histori brutaliteti kundër civilëve në Siri.

Ndërkohë, prokurorët ukrainas të caktuar posaçërisht për krimet e luftës dhe ekspertët mjeko-ligjorë kanë zhvarrosur nëntë trupa të tjerë nga një varr masiv i zbuluar në territorin e kishës lokale, duke e çuar  në 30 numrin e personave të varrosur  me nxitim nga trupat ruse.

LEXONI GJITHASHTU:

• Çernihiv, qyteti i shkatërruar prej javësh pa ushqim dhe elektricitet
• Nis hetimi i masakrave në Ukrainë, hapen varret masive në Bucha