Gjermani, dy të plagosur pas seancës për vrasjen e boksierit shqiptar

Disa persona u qëlluan jashtë gjykatës rajonale në Bielefeld, Gjermani, ku po zhvillohej seanca gjyqësore për vrasjen e boksierit shqiptar nga Mitrovica, Besar Nimani.

Sipas Bild, mes të plagosurve janë babai dhe vëllai i një të pandehuri në gjyqin për vrasjen e boksierit Besar Nimani.

Njëri u plagos me armë zjarri në këmbë, ndërsa një tjetër raportohet se është plagosur rëndë nga një plumb në gjoks dhe është reanimuar në vend përpara se të dërgohej në spital.

Sipas një rindërtimi fillestar, një burrë qëlloi nga një trotuar, më pas hipi në një makinë dhe qëlloi disa herë nga brenda.

Forca të shumta policie, përfshirë grupe speciale të ndërhyrjes së shpejtë, ndodhen në vendngjarje dhe kanë nisur një operacion në shkallë të gjerë, duke rrethuar zonën.

Alarmi për të shtënat bllokoi gjithashtu studentët dhe mësuesit e një shkolle të mesme që ndodhej pranë gjykatës, të cilët duhej të barrikadoheshin në klasa për arsye sigurie.

Policia e armatosur rëndë ka rretuhar vendin e ngjarjes, duke u bërë thirrje të gjithëve të shmangin zonën.

Autoritetet konfirmuan se një operacion në shkallë të gjerë është duke u zhvilluar dhe se një person është arrestuar.

Është edhe një person i dytë në kërkim, i cili mund të jetë barrikaduar në një ndërtesë pranë gjykatës së qarkut.

Boksieri Besar Nimani u vra në qytetin e Bielefeldit në Gjermani më 9 mars të vitit 2024. Sipas raportimeve nga mediat në Gjermani si dhe bazuar në deklaratat e dëshmitarëve në vendin e ngjarjes, Nimani u qëllua sapo doli nga restoranti.

Ai u qëllua me armë nga autorët të cilët lëvizën me një motor dhe më pas e braktisën për t’u larguar me makinë.

38-vjeçari Hyseyin Akkurt akuzohet për vrasjen e Nimanit më 9 mars të vitit të kaluar. Ai u arrestua në qershor të vitit të kaluar në Bruksel.

Dyshohet se ai së bashku me Aymand Dawoud Kirit, 33-vjeç, që është në arrati, e vranë Nimanin në Bielefeld. Ata shkrepën 16 plumba në drejtim të boksierit shqiptar që vdiq në vendin e ngjarjes.

LEXONI GJITHASHTU:

• Atentat në Gjermani, plagosen babai dhe vëllai i vrasësit të boksierit shqiptar
• Boksieri shqiptar që mundi serbin: Nuk doja ta provokoja me flamurin kuq e zi