Atentat në Gjermani, plagosen babai dhe vëllai i vrasësit të boksierit shqiptar

Në Bielefeld, Gjermani, u mbajt këtë të mërkurë gjyqi për vrasjen e boksierit shqiptar Besar Nimani.

Por menjëherë pas seancës gjyqësore, ndodhi një atentat ndaj familjarëve të të akuzuarit Hüseyin Akkurt.

Nga të shtënat, u plagosën rëndë vëllai dhe babai i tij, të cilët sapo kishin dalë nga gjykata.

Gjyqi për vrasjen e boksierit profesionist Besar Nimani (38) nisi në orën 9 të mëngjesit. Hüseyin Akkurt (38), i arrestuar në korrik në Bruksel, ishte i pranishëm në gjyq, ndërsa një i dyshuar tjetër vazhdon të jetë në arrati.

Sipas gazetës BILD, nga sulmi me armë u plagosën të paktën dy familjarë të të pandehurit. Vëllai dhe babai i tij janë mes të lënduarve, dhe ky i fundit është në gjendje kritike pasi është qëlluar në mushkëri.

Raportohet se ka edhe një person të tretë të plagosur.

Sulmi ndodhi rreth orës 13:30, vetëm 150 metra larg gjykatës. Dëshmitarët tregojnë se policia brenda sallës gjyqësore bërtiti: “Dikush po qëllon jashtë!”, dhe më pas forcat e sigurisë u vunë menjëherë në lëvizje.

Hüseyin Akkurt akuzohet se, së bashku me Ayman Dawoud Kirit (33), i zuri pritë Besar Nimanit më 9 mars të vitit të kaluar në Bielefeld.

Ata qëlluan të paktën 16 herë mbi viktimën, ndërsa ai po parkonte makinën e tij BMW X5 dhe po shkonte në një kafene. Dyshohet se motivi i vrasjes lidhet me larje hesapesh në botën e krimit.

LEXONI GJITHASHTU:

• Gjermani, dy të plagosur pas seancës për vrasjen e boksierit shqiptar
• Sulm ndaj agjentëve të policisë në Francë, oficerët qëllojnë për vdekje agresorin