Forcat e Armatosura të Gjermanisë kanë një afat prej tre vjetësh për të përfunduar blerjen e pajisjeve të nevojshme për të mbrojtur territorin e NATO-s nga një sulm të mundshëm rus.

Këtë ka deklaruar shefja e Zyrës për Prokurim Ushtarak të Gjermanisë, Annette Lehnigk-Emden, e cila ka theksuar se përgatitjet duhet të përfundojnë deri në vitin 2028.

Në një intervistë për gazetën Tagesspiegel, Lehnigk-Emden ka theksuar se “gjithçka që është e nevojshme për të mbrojtur shtetin dhe për të garantuar mbrojtjen efektive të territoreve të NATO-s duhet të blihet deri më 2028.” Ky deklaratë vjen pas rritjes së presionit që ka nisur pas pushtimit të Ukrainës nga Rusia në vitin 2022 dhe përpjekjeve të Shteteve të Bashkuara për të shtuar angazhimin e vendeve anëtare të NATO-s.

Gjenerali Carsten Breuer, shef i mbrojtjes në Gjermani, ka shprehur shqetësim për mundësinë e një sulmi të mundshëm rus ndaj shteteve baltike, anëtare të NATO-s, duke paralajmëruar se Rusia mund të jetë gati për të nisur një “sulm të shkallës së gjerë” deri në vitin 2029. Ai ka theksuar se forcat ruse janë grumbulluar me municione dhe tanke, duke u përgatitur për veprime të mundshme në këtë rajon.

Në këtë kontekst, Qeveria e re e kancelarit Friedrich Merz ka angazhuar qindra miliarda euro për të avancuar ushtrinë gjermane. Lehnigk-Emden ka theksuar se prioritet do të kenë pajisjet e rënda, përfshirë tanket kundërajrore dhe sistemet Skyranger. Kancelari Merz ka bërë të qartë se riarmatosja do të jetë një prioritet kryesor për koalicionin qeverisës, me qëllimin për të shndërruar ushtrinë gjermane në “ushtrinë konvencionale më të fuqishme në Evropë.”

Edhe gjatë qeverisjes së Olaf Scholzit, procesi i riarmatosjes kishte nisur pas pushtimit të Ukrainës, me një rritje të shpenzimeve për mbrojtje si pjesë e angazhimeve të Gjermanisë brenda NATO-s.

Për të përmbushur këto objektiva, presidenti i SHBA-së, Donald Trump, ka bërë thirrje për rritjen e shpenzimeve të mbrojtjes nga 2% në 5% të PBB-së për të gjithë shtetet anëtare të NATO-s.

LEXONI GJITHASHTU:

• Perandoritë e Elon Musk “të pasigurta”: Investitorët në alarm pas sherrit me Trump
• Sulmet izraelite vrasin rreth 50 palestinezë në Gaza, qindra të plagosur