Gjermania miraton ligjin që lehtëson ndryshimin e gjinisë, mjafton vetëm një kërkesë

Parlamenti gjerman miratoi një ligj të ri të premten, i cili lehtëson procedurat ligjore për ndryshimin e emrave dhe identitetit gjinor.

“Akti i Identitetit Gjinor” u mbështet gjerësisht nga koalicioni qeverisës i kancelarit Olaf Scholz, megjithëse debatet në sallë ishin të forta.

Numërimi përfundimtar i votave ishte 374 pro dhe 251 kundër.

Përpara legjislacionit të ri – i cili hyn në fuqi më 1 nëntor – ata që aplikonin për të ndryshuar ligjërisht gjininë kishin nevojë për miratimin e dy psikiatërve

Një gjykatë më pas do të vendoste nëse ndryshimi ligjor lejohej, ose jo.

Tani, sipas ligjit të ri, të rriturit e moshës 18 vjeç e lart duhet të njoftojnë autoritetet vetëm tre muaj më parë. Pastaj është një procedurë e thjeshtë për të zgjedhur një gjini të re nga tre opsionet ekzistuese në legjislacionin gjerman.

Për shtetasit gjermanë të moshës 14-18 vjeç, aplikime të tilla për ndryshimin e emrit ose gjinisë duhet të miratohen nga prindërit.

Nëse ata refuzojnë, një aplikant mund t’i drejtohet Gjykatës së Familjes për të anashkaluar fjalën e tyre. Për personat nën 14 vjeç, prindërit ose kujdestarët duhet të paraqesin një kërkesë në emrin e tyre.

Ligji i ri trajton vetëm procedurat ligjore dhe nuk ndryshon rregullat e kirurgjisë për ndryshimin e gjinisë.

LEXONI GJITHASHTU:

• Gjermania do t’ia dorëzojë Ukrainës edhe një sistem Patriot
• Dyshohet se planifikuan sulm terrorist, arrestohen 3 të rinj në Gjermani