Gjiknuri: I kemi ofruar opozitës hapjen e kutive në rast kontestimesh të rezultatit

Përfaqësuesi i Partisë Socialiste në Këshillin Politik, Damian Gjiknuri pranoi për mediat mbrëmjen e së shtunës se palët nuk kishin gjetur dakordësi për sa i përket çështjes së përfshirjes së teknologjisë në procesin e zgjedhjeve. Ai këmbënguli se socialistët mbeten të hapur për të gjetur konsensus por vetëm sipas rekomandimeve të OSBE/ODIHR-it.

Përballë deklaratave të opozitës se të gjitha propozimet e saj ishin refuzuar, Gjiknuri iu shmang pyetjeve nëse mazhoranca do ta kalojë e vetme reformën nëse edhe nesër nuk arrihet dakordësia, por theksoi se këtë garanci ajo vazhdon ta ketë.

Deputeti socialist këmbënguli se opozita ka dalë nga kuadri i rekomandimeve të OSBE/ODIHR-it teksa zbuloi se çështja e sistemit është rënë dakord të trajtohet në fazën e dytë të reformës zgjedhore, çka nënkupton pas miratimit të saj me ndryshime që do të kërkohen në ligje.

“Kemi ofruar hapjen e kutive pas çdo kontestimi të mundshëm pas shpalljes së rezultatit për çdo parti, mundësi të cilën na e mohuan në vitin 2009” – tregoi Gjiknuri, teksa zbuloi se është pranuar vendosja e kamerave në çdo qendër votimi, por që implementimi i teknologjisë për aspekte të tjera kërkon që të bëhen hap-pas-hapi.

I dërguari i socialistëve në Këshillin Politik pretendoi se opozita kërkon që të mbahet administrimi aktual i procesit zgjedhor pavarësisht se ajo e ka akuzuar vazhdimisht për mekanizëm manipulimi.

Mbledhja e së shtunës në tryezën zgjedhore zgjati më shumë se 4 orë, por pavarësisht thirrjeve të deputetes Rudina Hajdari, ajo u ndal edhe pse pa arritur dakordësi.

Lexoni gjithashtu:

Nuk ka dakordësi në Këshillin Politik, opozita akuzon mazhorancën se refuzoi të gjitha propozimet