GJKKO kalon për gjykim dosjen për atentatin ndaj prokurorit Arjan Ndoja

Gjykata e Posaçme Kundër Krimit të Organizuar dhe Korrupsionit ka vendosur të kalojë për gjykim, dosjen ndaj Redian Rrajës dhe Ariol Halilajt.

Ata akuzohen për atentatin e kryer ndaj prokurorit Arjan Ndoja, shokut të tij Aleksandër Laho dhe Andi Malokut. Ky i fundit punonte si shofer i prokurorit Ndoja, ndërsa për shkak të plagëve të marra humbi jetën një javë më vonë në Spitalin e Traumës në kryeqytet.

Atentati ndaj prokurorit Arjan Ndoja u regjistrua më 1 nëntor të 2019 në autostradën Durrës-Tiranë, në afërsi të mbikalimit të Shkozetit. Personat e mësipërm, të cilët akuzohen për ngjarjen dyshohet se qëlluan më armë zjarri në drejtim të automjetit me të cilin udhëtonin Andi Maloku, Arjan Ndoja dhe Aleksandër Laho.

Ndaj tyre rëndojnë pesë vepra penale si; vrasja e funksionarëve publikë, vrasja në rrethana të tjera cilësuese, mbajtja e armëve pa leje, vjedhje dhe për grup të strukturuar kriminal.

Lexoni gjithashtu:

Atentati ndaj prokurorit të Durrësit, ndalohet një nga autorët e dyshuar

SPAK kërkon shtyrjen me tre muaj të hetimeve për atentatin ndaj prokurorit të Durrësit, Arjan Ndoji

Atentati ndaj prokurorit Arjan Ndoja, SPAK mbyll hetimet paraprake