GJKKO ndan “çështjen Dako”, disa nga të akuzuarit i kalojnë Gjykatës së Durrësit

Gjykata e Posaçme shpalli moskompetencën për Ferzilet Hajdërin, Adnand Toçin, Diana Dedjan, Bashkim Salillarin dhe Hanza Rekën, të cilët kërkuan gjykim të zakonshëm dhe ndarjen e çështjes nga ish-kryebashkiaku i Durrësit, Vangjush Dako.

Gjyqtarja Elsa Ulliri vendosi kalimin e dosjes në ngarkim të këtyre personave në Gjykatën e Durrësit, si gjykatë kompetente për të shqyrtuar çështjen ndaj tyre, të akuzuar për shpërdorim detyre.

Sakaq në Gjykatën e Posaçme mbetën ish-kryebashkiaku Vangjush Dako, Fiqiri Farruku, Fatmir Ejupi dhe Adrian Bulku.

Ish-kryebashkiaku i Durrësit, Vangjush Dako, akuzohet se ka kryer veprën penale “shpërdorim detyre” në dy raste. Një rast ka të bëjë me ndërtimin e një pallati në Durrës 11 vjet më parë, i cili u shemb nga tërmeti në nëntor të vitit 2019, dhe rasti tjetër ka të bëjë me një tender për ndërtimin e një shëtitorje në vitet 2014-2015, që i ka shkaktuar buxhetit të shtetit një dëm prej 18 milion lekësh.

Dako u arrestua në muajin qershor të vitit 2023 me urdhër të Prokurorisë së Posaçme dhe u la i lirë në shkurt të këtij viti, pasi SPAK nuk arriti të përfundojë hetimet e caktuara nga gjykata brenda afateve. Pas pak ditësh pritet të jepet pretenca për ish-kryebashkiakun e Durrësit nga SPAK.

LEXONI GJITHASHTU:

• Apeli lë në fuqi vendimin ndaj Vangjush Dakos, rrëzohet ankimi i SPAK
• SPAK mbyll hetimet për Vangjush Dakon