“Gjobë kush hiqet si farmacist”, Toma: Masë qesharak, rrezikojnë jetën e qytetarëve

Gjobë për këdo që shërben në farmaci dhe nuk ka arsimin përkatës. Kjo është masa ndëshkuese e përcaktuar në ligjin për barnat dhe farmaceutikën, që konsiderohet qesharake nga specialistët.

Presidentja e Urdhrit të Farmacistëve, Diana Toma argumenton se në raste të tilla ligji duhet të jetë i ashpër pasi është  në lojë jeta e qytetarëve.

“Ligji nuk vendos barriera të atilla që të mos guxojë njeri që nuk është farmacist të shkojë pas banakut, ligji nuk e garanton sepse ka masa qesharake. Ndëshkueshmëria për të tilla raste nuk duhet të jetë me gjoba karshi subjekteve. Situata të tilla shumë të mprehta rrezikojnë jetën e qytetarëve”, thotë Diana Toma, presidente e Urdhrit të Farmacistëve.

Por nuk është ky problem që konstatohet tek ligji i barnave, i ndryshuar në dhjetor të vitit 2022. Sipas Tomës, ky ligj nxit konkurrencën e pandershme.

“Në 2009 u propagandua heqja e kritereve për hapjen e farmacive si rritje e aksesit. Ajo që u propagandua si rritje e aksesit na çoi në grumbullime pranë ambulancave, pranë spitaleve dhe nuk solli shtrirje të rrjetit farmaceutik. Duke pasur një grumbullim ato rregullat në fillim në mënyrë të padukshme dhe tani, jo në mënyrë të padukshme, por pa kokëçarje fare u thyen. Këto thyerje çojnë në cenim të etikës drejtpërdrejtë, bëjnë pacientët viktima dhe vënë në kufijtë e mbijetesës profesionistët”, u shpreh Toma.

Farmacistët referojnë se ndërhyrjet në ligjin e barnave dhe farmaceutikës nuk kanë zgjidhur asnjë problematikë me të cilën haset tregu vendas. Po ashtu, ligji nuk është përafruar me direktivat e Bashkimit Europian, duke bërë që shërbimi të shkojë i cunguar tek pacienti.

LEXONI GJITHASHTU:

• Pas mjekëve, edhe farmacistët braktisin vendin. Toma: Nuk plotësojmë dot turnet
• Merrnin para nga farmacitë, kush janë zyrtarët e Agjencisë së Barnave të arrestuar