Gjykata Kushtetuese rikthen për shqyrtim çështjen e zgjedhjeve të 30 qershorit

Gjykata Kushtetuese ka vendosur të rikthejë për shqyrtim çështjen e zgjedhjeve lokale të 30 qershorit 2019, duke caktuar datën 2 nëntor për rihapjen e seancës.

Në njoftimin e shpërndarë për media Kushtetuesja sqaron se me dërgimin një ditë më parë të opinionit nga ana e Komisionit të Venecias, gjykata vlerësoi se duhet të rihapet seanca plenare publike, ‘pasi me ardhjen e opinionit ka rënë shkaku i masës së pezullimit të shqyrtimit të çështjes’.

Në muajin qershor, Gjykata Kushtetuese kërkoi mendimin e Venecias lidhur me çështjen e zgjedhjeve vendore të vitit 2019, të cilat u mbajtën pa opozitën.

Padia në Gjykatën Kushtetuese u bë nga Shoqata e Bashkive e drejtuar nga kryebashkiakja e Shkodrës, Voltana Ademi, e cila kërkoi shpalljen e tyre të pavlefshme.

Kushtetuesja kërkoi mendimin e Venecias duke argumentuar se çështja e pavlefshmërisë së zgjedhjeve është një rast unik për drejtësinë shqiptare dhe kërkon mendim më të specializuar.

Në opinionin e Komisionit të Venecias, të zbardhur disa ditë më parë, thuhet mes të tjerash se shqyrtimi i vlefshmërisë së zgjedhjeve të 30 qershorit nuk përfshihet në kompetencat e Gjykatës Kushtetuese.