Gjykata Kushtetuese shtyn për nesër seancën për çështjen e teatrit

Në Gjykatën Kushtetuese nisi sot seanca për prishjen e teatrit, ku ka pasur përplasje pretendimesh midis përfaqësuesve të Presidencës dhe të Kryeministrisë në lidhje me dorëzimin e provave nga ana e qeverisë.

Si përfundim, Gjykata vendosi të shtyjë seancën për nesër në orën 10, pasi pranoi të administrojë si provë edhe vendimin e Këshillit Bashkiak për prishjen e teatrit.

Gjatë seancës së sotme, këshilltari për Çështjet Ligjore i presidentit, Bledar Dervishaj, tha se Gjykata nuk i ka administruar provat që ka kërkuar presidenti i shtetit.

“Kërkuam prova shtesë dhe dëshmitarë. Ne kërkuam projektin e teatrin kombëtar, dhe prapë nuk na ka ardhur. Ne kërkuam dokumentacionin qe i parapriu ligjit special dhe sërish nuk na është vënë në dispozicion. Me vendimin e këshillit bashkiak ka një seri shkeljesh kushtetuese”, u shpreh z. Dervishaj.

Presidenti Ilir Meta kërkon në Gjykatën Kushtetuese shfuqizimin e kalimit të pronësisë së teatrit nga Ministria e Kulturës tek Bashkia Tiranë dhe shfuqizim të procedurës së kontratës për ndërtimin e godinës së re të Teatrit Kombëtar.

Gjykata, nga ana tjetër, tha qeveria nuk ka sjellë dokumentet dhe provat në afatet e caktuara dhe për këtë edhe Presidencës i janë përcjellë jashtë afatit. Sipas Gjykatës, si ministritë përkatëse, si kryeministri, i kanë dorëzuar dokumentet jashtë afateve.

Kryeministria pretendoi se i ka dorëzuar dokumentet brenda afateve kushtetuese, me datë 8 qershor që ishte afati i fundit, ndaj kërkoi rrëzimin e kërkesës së presidentit dhe pranimin e provave të administruara.

Bledar Dervishaj shtoi se e drejta për të kërkuar shtimin e padisë për shembjen e teatrit ekziston sipas ligjit dhe të drejtës Kushtetuese.

Kujtojmë se Teatri Kombëtar u shemb me datë 17 maj të vitit 2020, pak orë para se të gdhinte, ndërsa aktivistët për mbrojtjen e tij ishin në ambientet e teatrit. Atë ditë dhe ditët në vazhdim pati protesta nga aktivistë dhe nga shoqëria civile.

Debati për ndërtimin e Teatrit të ri Kombëtar nisi në fund të vitit 2017 dhe fillim të vitit 2018, por shembja e godinës u bë pasi kryebashkiaku Erion Veliaj arriti marrëveshjen me disa nga artistët për ndërtimin e godinës së re.