Gjykata në Madrid çon në gjyq bashkëshorten e kryeministrit spanjoll, Sánchez: Akuza të pabaza dhe politike

Një gjykatë në Madrid ka urdhëruar që bashkëshortja e kryeministrit të Spanjës, Begoña Gómez, të dalë në gjyq me akuza për përvetësim, abuzim me ndikimin, korrupsion në korporata dhe vjedhje të markave tregtare.

Vendimi vjen pas një hetimi dyvjeçar lidhur me aktivitetin e saj si profesoreshë në një universitet privat në Madrid, ku dyshohet se ajo ka përdorur lidhjet e saj me kryeministrin Pedro Sánchez për të ndikuar tek autoritetet dhe zyrtarët në vendimmarrje.

Sipas raportimeve të mediave spanjolle, përfshirë El País, Gómez është njoftuar për vendimin ndërsa ndodhej në një udhëtim zyrtar me bashkëshortin e saj në Kinë.

Së bashku me të, në gjyq do të dalin edhe ish-këshilltarja e zyrës së kryeministrit, Cristina Álvarez, si dhe biznesmeni Juan Carlos Barrabés. Gjykatësi ka vendosur që nëse çështja shkon për gjykim, ajo do të shqyrtohet nga një juri popullore, e përbërë nga qytetarë të zakonshëm.

Si mbrojtja e Gómez, ashtu edhe prokuroria, kanë deklaruar se çështja nuk përbën vepër penale dhe duhet të pushohet. Megjithatë, gjykata ka vendosur ta çojë më tej procesin hetimor dhe gjyqësor.
Kryeministri Pedro Sánchez ka mbrojtur publikisht bashkëshorten e tij, duke theksuar se ajo është “e ndershme, profesionale dhe e përgjegjshme”. Ai ka deklaruar më herët në parlament se qeveria e tij është “e pastër” dhe se akuzat ndaj saj nuk mbështeten në prova konkrete, por në “shpifje dhe sulme politike”.

Hetimi ndaj Begoña Gómez ka nisur në prill të vitit 2024, pas një padie të ngritur nga organizata “Manos Limpias”, ndërsa më pas është bashkuar edhe organizata “Hazte Oír”, të cilat akuzojnë për korrupsion dhe ndikim të papërshtatshëm.

Çështja pritet të vijojë në gjykatë në javët në vijim, duke tërhequr vëmendje të madhe në skenën politike spanjolle dhe më gjerë në Bashkimin Evropian.