Gjyqi “Partizani”, dëshmia e Urim Mujës: S’kam qenë ndonjëherë te ish klubi, nuk e di ku ndodhet

Ish-drejtori i Administratës dhe Shitjes së Pronës në Ministrinë e Financave, Urim Muja këtë të hënë ka dëshmuar në GJKKO lidhur me dosjen “Partizani”.  

Gjatë dëshmisë së tij, Muja sqaroi se ka shërbyer në Ministrinë e Financave gjatë periudhave 1992-1996 dhe 2006-2013. Ai shpjegoi se funksioni i drejtorisë që ai drejtonte ishte lidhja e kontratës së shitjes fillimisht sapo dosja mbërrinte e kompletuar nga Ministria e Ekonomisë.

Lidhur me mungesën e dokumenteve të caktuara gjatë procesit, ai sqaroi se ky ishte një fenomen i zakonshëm dhe se ndiqej gjithmonë e njëjta procedurë filtrimi nga sektori i shitjes: nëse konstatohej mungesë, palës i kërkohej thjesht plotësimi dhe sjellja e dokumentit. Ai deklaroi se nuk ka qenë asnjëherë te ish-klubi.

“Kam qenë i punësuar në Ministrinë e Financave në ‘92-96 mos gaboj, në 2006 deri në 2013, pastaj pa punë. Funksioni im, drejtor administrate dhe shitje prone. Sipas ligjit, lidhnim kontratë shitje sapo dosja vinte nga Ministrinë e Ekonomisë. Kjo është dosje normale si gjithë të tjerat, pra kishte një praktikë, detajet si mbaj mend, jam i sigurt që e kemi bërë konform ligjit.

Nuk ka element përjashtimor, jam i sigurt që s’kishte asgjë të pazakonte si dhjetra dosje të tjera që na kanë ardhur, asnjë problem të pazakontë s’kemi patur në atë dosje. Mungon një dokument, i kemi thënë hajde bjere si për dhjetra raste të tjera, asnjë përjashtim, sa e sa herë mungojnë dokumente dhe i themi palës plotësoje, sille, nëse e ka e sjell kaq.

Ajo dosje kalon nëpër filtra në sektorinin e shitjes ka thënë duhet edhe kjo shkresë, siç kemi vepruar për këtë kemi vepruar çdo rast tjetër. Nuk e kam parë ndonjëherë ku ndodhet ish klubi, skam qenë asnjëherë.

Letrat me vlerë janë përdorur edhe para administratës ku kemi qenë ne, absolutisjt që janë përdorur edhe në raste të tjera, me emra smë kujtohen por janë përdorur sipas ligjit. Sikur kjo dosje të krijohej sot, të shkonin tek drejtoria që kam qenë, ata do e shesin, se i detyron ligji jo dikush a diçka tjetër”, tha ai.