Goditet grupi kriminal i vjedhjeve në Durrës dhe Tiranë, 4 të arrestuar, 1 në kërkim

Policia ka finalizuar operacionin e koduar “Theft Network”, duke goditur një grup kriminal që kryente vjedhje automjetesh, mjetesh lundruese dhe banesash në qarkun e Durrësit dhe Tiranës. Si rezultat i këtij operacioni, janë vënë në pranga katër persona, ndërsa një tjetër është shpallur në kërkim.

Nga hetimet janë konstatuar katër raste vjedhjesh të ndodhura në Sukth, në fshatin Bilalas dhe në Mullet, Tiranë. Konkretisht, është zbardhur vjedhja e një mjeti lundrues skaf në Sukth, një tabakinoje në fshatin Bilalas, si dhe dy automjeteve, një furgon dhe një kamionçinë  të vjedhura në Mullet më 13 shkurt 2025.

Gjatë operacionit, policia ka sekuestruar një mjet lundrues, një kamionçinë, rrobat e përdorura nga autorët gjatë një prej vjedhjeve dhe katër celularë.

Të arrestuarit lidhur me këtë rast janë:

• Donald Subashi 26 vjeç, banues në Marikaj;
• Denis Marku 18 vjeç, banues në Shkodër;
• Elvis Muça 38 vjeç, banues në Mamurras;
• Artur Lama 48 vjeç, banues në Mamurras.

Në kërkim është shpallur shtetasi me iniciale E.Z., 49 vjeç, banues në Tiranë.

Ndërkohë vijojnë veprimet hetimore për dokumentin ligjor të vjedhjeve të tjera të kryera nga këta shtetas.

Materialet procedurale i kaluan Prokurorisë Pranë Gjykatës së Shkallës së Parë Durrës, për veprën penale “Vjedhja” e kryer në bashkëpunim.

LEXONI GJITHASHTU:

• Plagosën me sende të forta një person, arrestohet 22-vjeçari, në kërkim i vëllai
• Goditën me grushte policin, arrestohen dy persona në Pogradec