Goditi me grusht qytetarin, avokati: Sjellja e Armend Zemajt e dënueshme ligjërisht

Avokati i qytetarit të dhunuar nga deputeti i LDK-së, Armend Zemaj e ka cilësuar aktin si një sjellje e papranueshme dhe e dënueshme ligjërisht. Avokati Liridon Kutllovci ka paralajmëruar ndërmarrjen e të gjitha veprimeve ligjore në mënyrë që ky rast të mos mbetet pa përgjegjësi dhe dinjiteti i qytetarit të mbrohet.

“Gjatë ditës së sotme, Zemaj ka qenë duke dhënë një intervistë publike, ndërsa klienti im, i shoqëruar nga bashkëshortja e tij, ka kaluar pranë dhe i është drejtuar deputetit me fjalët: “Të gjithë jeni njësoj, vetëm gënjeni” dhe kjo ka ardhur si pasojë e frustrimit qytetarë në lidhje me gjendjen politike e ekonomike të vendit”, tha avokati për KosovaPress.

Kutllovci shtoi se në vend që deputeti Zemaj të ruante qetësinë dhe etikën që i takon një përfaqësuesi të Kuvendit, ai i është drejtuar qytetarit me fjalë fyese “Gënjen nëna dhe gruaja juaj”.

“Ky fjalor i papranueshëm është përdorur në prani të bashkëshortes së qytetarit. Pas rreth 20 sekondash, deputeti Armend Zemaj e ka sulmuar fizikisht klientin tim me grusht, pa asnjë provokim tjetër nga ana e tij”, ka thënë Kutllovci.

Sipas avokatit, klienti i tij nuk i është kundërpërgjigjur me dhunë por ka thirrur policinë.

“Ky akt përbën sjellje të papranueshme dhe të dënueshme ligjërisht, veçanërisht kur vjen nga një deputet i Kuvendit të Kosovës që ka për detyrë të japë shembull qytetarie dhe respekti ndaj ligjit.

Ne do të ndërmarrim të gjitha veprimet e nevojshme ligjore, në mënyrë që ky rast të mos mbetet pa përgjegjësi dhe që dinjiteti i qytetarit të mbrohet plotësisht”, ka thënë Kutllovci.

Deputeti Zemaj lidhur me ngjarjen është shprehur se qytetari e ofendoi dhe e provokoi me fjalë të papranueshme. Ai shtoi se ka reaguar për vetëmbrojtje.

LEXONI GJITHASHTU:

• Raundi i dytë i zgjedhjeve lokale në 18 komuna në Kosovë, fushata hapet në 3 nëntor
• Deputeti i LDK-së, Armend Zemaj godet me grusht qytetarin: Më provokoi