Gonzato takon kreun e SPAK: Lufta kundër korrupsionit, element kyç për integrimin

Ambasadori i Bashkimit Evropian në vendin tonë, Silvio Gonzato ka zhvilluar një takim me kreun e ri të Prokurorisë së Posaçme Klodjan Braho.

Në njoftimin e publikuar në faqen zyrtare të zyrës së BE në vendin tonë, bëhet me dije se në takim, ambasadori i Bashkimit Evropian theksoi “rëndësinë e vazhdimit të rezultateve të prekshme në luftën kundër krimit të organizuar dhe korrupsionit, një element kyç për përparimin e Shqipërisë drejt anëtarësimit në Bashkimin Evropian”.

“Takimi i parë me Kryetarin e ri të Prokurorisë së Posaçme, Klodjan Braho. E përgëzova për arritjet deri më sot dhe theksova rëndësinë e vazhdimit të rezultateve të prekshme në luftën kundër krimit të organizuar dhe korrupsionit, një element kyç për përparimin e Shqipërisë drejt anëtarësimit në Bashkimin Evropian. Forcimi i kapaciteteve hetimore dhe garantimi i standardeve të larta në hetime dhe ndjekje penale, janë vendimtare për konsolidimin e progresit dhe arritjen e rezultateve të qëndrueshme. Bashkimi Evropian mbetet plotësisht i përkushtuar për të mbështetur Prokurorinë e Posaçme dhe sundimin e ligjit në Shqipëri”, thuhet në njoftimin e publikuar në Facebook.