Drejtori dhe specialisti i Këshillit të Qarkut në Vlorë arrestohen për grabitjen e dosjes ‘Dhërmiu’

Tre persona janë arrestuar nga policia në lidhje me grabitjen e ndodhur katër ditë më parë në zyrat e administrimit të Tokës në Vlorë.

Dy prej të arrestuarve ushtronin funksion publik në Këshillin e Qarkut.

Bardhyl Gjika është drejtori i Drejtorisë së Administrimit dhe Mbrojtjes së Tokës, pranë Këshillit të Qarkut Vlorë që u grabit, ndërsa Kreshnik Mino specialist. 

Nga hetimet ka rezultuar se Gjika, në bashkëpunim me specialistin e kësaj drejtorie shtetasin Kreshnik Mino dhe shtetasin S. D,  dyshohen se kanë falsifikuar formularët e marrjes së tokës në pronësi dhe të regjistrimit të pasurisë, në fshatin Dhërmi.

Çështja do të ndiqet nga prokuroria e Vlorës, ku të akuzuarit do të përballen me akuzat “Shpërdorimi i detyrës nga persona që ushtrojnë funksione publike” dhe “Falsifikimi i vulave, stampave ose formularëve”, e kryer në bashkëpunim.