Një grevë 6-ditore e thirrur nga sindikata e drejtuesve të trenave, GDL, ka vënë në rrezik funksionimin e trafikut hekurudhor në Gjermani.

Bëhet fjalë për grevën e katërt të organizuar nga GDL. Për pasojë, shumica e udhëtimeve ndërkufitare janë anuluar, me përjashtim të pjesës zvicerane, që funksionon nga një tjetër linjë trenash.

“Me siguri sindikatës nuk do t’i pëlqejë fakti që ka një alternativë. Por ajo është një alternativë e mirë dhe shumë korrekte. Është gjithmonë në kohë”, thotë Katharina Stauder, mësuese.

Sipas operatorit shtetëror të hekurudhave, “Deutsche Bahn”, rreth 80 për qind e itinerareve të gjata janë anuluar, ndërkohë që kufizime ka pësuar edhe transporti rajonal.

Negociatat kanë qenë të vështira. Sindikata kërkon reduktimin e orëve të punës nga 38 në 35, pa ulje të pagës. Madje, ajo kërkon një rritje prej 555 eurosh në muaj dhe një bonus prej 3 mijë eurosh për të kompensuar efektet e inflacionit.