Gruaja në Brazil çon “xhaxhain” e vdekur në bankë për të marrë kredi, arrestohet

Në Brazil, një grua e çoi trupin e një burri 68-vjeçar në një karrocë me rrota në një degë banke, ku duke lëvizur dorën e tij, u përpoq të nënshkruante një marrëveshje kredie, edhe pse burri kishte vdekur disa orë më parë, tha sot policia braziliane.

Pamjet e kamerave vëzhguese tregojnë Erika Vieira Nunes duke drejtuar trupin e një burri në një karrocë me rrota në një bankë në periferi të Rio de Janeiro të martën teksa i thotë arkëtarit se burri donte të merrte një kredi prej 17,000 reale, ose 3,250 dollarë, raporton Reuters.

Ajo mbante një stilolaps dhe lëvizte dorën e burrit duke thënë: “Xhaxha, po dëgjon? Duhet të firmosësh” dhe i tha arkëtarit se “xhaxhai i saj nuk thotë kurrë asgjë sepse është kështu”, tha policia.

Më pas ajo iu drejtua të vdekurit duke i thënë: “Nëse nuk je mirë, do të të çoj në spital”.

Punonjësit e bankës dyshuan pasi burrit i binte koka sapo gruaja ndalonte së mbajturi dhe më pas është thirrur policia, e cila ka mbërritur me shpejtësi dhe ka arrestuar gruan me akuzën e mashtrimit.

Avokati i saj këmbënguli se burri kishte vdekur në bankë, por policia përmes analizave mjeko-ligjore përcaktoi se ai kishte vdekur para se të mbërrinte në bankë.

LEXONI GJITHASHTU:

• Të paktën 23 të vdekur nga shirat e rrëmbyer në Brazil, shpërngulën 5000 njerëz
• Sekuestrohen 260 kg kokainë në Slloveni, arrestohet një shqiptar e një brazilian