Grupimi i ri brenda PD, Bozdo: në PD ka një energji që kërkon që gjerat të ndryshojnë rrënjësisht

Në studion e “Now”, Eno Bozdo nga Partia Demokratike tha se aksionet e fundit brenda PD-së tregojnë për një energji e cila kërkon që në Partinë Demokratike gjërat të ndryshojnë rrënjësisht.

Përveç ndasisë midis ish-kryeministrit Berisha dhe kreut të PD-së Lulzim Basha, brenda PD-së është krijuar edhe një fraksion i ri, “Iniciativa Demokratike”, nga demokratët Fatbardh Kadilli, Ivi Kaso, Eno Bozdo, Arben Ristani dhe Artan Hoxha.

Eno Bozdo tha se ideja e këtij fraksioni ka nisur që me humbjen e PD-së në zgjedhjet e 25 prillit.

“Lidershipi i partisë kërkonte që humbja t’i faturohej vetëm manipulimeve të palës tjetër, mirëpo pavarësisht kësaj, PD-ja nuk ishte e aftë që të fitonte besimin e qytetarëve shqiptarë”, u shpreh z. Bozdo.

Për PD-në, Eno Bozdo tha se nuk mund të veprojë si ndërmarrje, ku vendimet i merr, sipas tij, vetëm kryetari. Ai theksoi se brenda partisë duhet të ndryshojnë personat, verbi politik, aksionet, kauzat e drejta, dhe përmbajtja ndaj ideologjisë.

“Duhet t’i mbahemi ideologjisë pasi kemi devijime të jashtëzakonshme nga ideologjia”, u shpreh z. Bozdo.

LEXONI GJITHASHTU:

• Në krah të Berishës në Durrës, Bylykbashi: Demokracia e brendshme nuk duhet të humbasë