Hapet gropa 50 metra para spitalit në Bangkok, përpin makina dhe shtylla elektrike

Një gropë 50 metra e thellë u hap mëngjesin e së mërkurës përpara Spitalit Wajira në Bangkokun qendror, dhe shembja e tokës shkatërroi makina dhe shtylla të energjisë elektrike.

Shfaqja e një krateri në tokë u shoqërua me shpërthimin e tubave nga të cilët dolën rryma uji, ndërsa shtyllat dhe kabllot elektrike të rrëzuara hodhën shkëndija elektrike, raporton Reuters.

Pacientët dhe banorët e apartamenteve aty pranë u evakuuan kur një gropë, rreth 30 metra katrorë e gjerë dhe 50 metra e thellë, u shfaq përpara spitalit publik.

Spitali ka njoftuar se nuk do të pranojë pacientë deri në njoftim të mëtejshëm.

Guvernatori i Bangkokut, Chachart Sitipunt, tha se një tub kishte shpërthyer, kështu që ishin prerë edhe kabllot e ujit dhe të energjisë elektrike.

“Spitali nuk ka probleme, por jemi të shqetësuar për stacionin e policisë, është ende e rrezikshme atje dhe njerëzit janë evakuuar”, tha Sitipunt.

Autoritetet thanë se kanë ndaluar zgjerimin e mëtejshëm të gropës dhe po e monitorojnë nga afër vendin.

LEXONI GJITHASHTU:

• Gazetarja nga Bangkoku rrëfen për Euronews Albania tmerrin e tërmetit 7.7 ballë
• Zjarr në tregun e famshëm të Bangkok, digjen rreth 1000 kafshë