Harris-Netanyahut: Nuk mund të bëjmë sikur nuk e shohim tragjedinë në Gaza

Protesta kundër luftës u mbajtën në Shtëpinë e Bardhë teksa kryeministri izraelit Benjamin Netanyahu zhvilloi bisedime me zëvendës presidenten Kamala Harris.

Harris i shprehu Netanyahut “shqetësimin serioz” për situatën humanitare në Gaza pas 9 muaj luftë mes Izraelit dhe Hamasit.

“Pamjet e fëmijëve të vdekur dhe ato të njerëzve të uritur që braktisin shtëpitë për arsye sigurie janë shqetësuese. Ne nuk mund të bëjmë sikur nuk i shohim këto tragjedi. Nuk mund t’i lejojmë vetes të mbetemi të mpirë ndaj vuajtjes dhe unë nuk do të hesht.” –u shpreh Harris.

Vizita e parë e Netanyahut në Shtëpinë e Bardhë që prej 2020-s erdhi një ditë pas fjalimit të tij në Kongres, ku u zotua për një “fitore totale” ndaj Hamas dhe denoncoi kundërshtarët e luftës duke i cilësuar “idiotë”.

Bisedimet mes tij dhe Harris, që pritet të jetë e nominuara demokrate për zgjedhjet pas tërheqjes së Joe Biden, erdhën pas një takimi të zhvilluar më herët gjatë së enjtes me presidentin në ikje të Shteteve të Bashkuara.

Burime nga Shtëpia e Bardhë deklaroi se negociatat për armëpushim, që vazhdojnë prej javësh, janë në fazat përfundimtare, por ka ende çështje të pazgjidhura.

Ndërkohë, sekretari i përgjithshëm i OKB-së, Antonio Guterres e ka quajtur situatën humanitare në Gaza një “katastrofë totale”.

“Jemi në një situatë të dalë tërësisht nga kontrolli. Një situatë ku ligji dhe rendi janë zhdukur. Askush nuk është përgjegjës për sigurinë në Gaza. Ndaj ne shohim autokolona kamionësh që sulmohen në çdo çast.” –deklaroi sekretari.

Që nga fillimi i luftës ndaj Hamas vitin e kaluar, mbi 39 mijë palestinezë janë vrarë në Gaza dhe bilanci i vdekjeve në Izrael llogaritet në 1.200 viktima.