Haxhiu: Lëvizja Vetëvendosje ka gjasa të mos fitojë asnjë komunë në raundin e parë

Më 17 tetor, qytetarët e Kosovës do t’u drejtohen qendrave të votimit për të zgjedhur kryetarët e komunave.

Analisti Baton Haxhiu thotë  në “Shock” se fryma dhe besimi i qytetarëve ka rënë si për Vetëvendosjen ashtu dhe për kryeministrin Kurti.

Ai thekson se në këto zgjedhje lokale, Lëvizja Vetëvendosja do ta ketë të vështirë të shpallet fituese me raundin e parë, duke lënë të kuptohet se në shumë komuna do ketë balotazh.

“Ka filluar një etapë e re edhe e Vetëvendosjes dhe e kryeministrit. Të gjitha fjalitë e dikurshme janë hedhur duke harruar gjithçka, që ka ndodhur dikur. Lëvizja Vetëvendosje ka gjasa, që mos ta kalojë asnjë komunë në raundin e parë. Në çfarëdo varianti VV e ka shumë të vështirë ta humbasë Prishtinën dhe Prizrenin”, tha Baton Haxhiu.

Haxhiu liston dy arsye kryesore, që sipas tij kanë çuar në zbehjen e besimit të qytetarëve tek Lëvizja Vetëvendosje.

“Kosova po kthehet në ekuilibër te beteja politike dhe me një rënie të Vetëvendosjes. Pritjet kanë qenë të mëdha, sepse frymëzimi ka qenë i madh. Gjenerata e Vetëvendosjes ka pritur 20 vjet, por çfarë kanë ndodhur? Ata që kanë qenë idealistë të VV ende janë në pritje për punë. Kjo është arsyeja pse ka rënë dhe një ndër arsyet e tjera është edhe ndërhyrja në veri”,  tha ai.