Hekurudha Prishtinë-Durrës, qeveria e Kosovës ndan 1 milion euro për fizibilitetin

Qeveria e Kosovës ka parashikuar një fond prej 1 milionë eurosh për studimin e fizibilitetit për hekurudhën Prishtinë-Durrës.

Sipas ministrit të Infrastrukturës i Kosovës, Liburn Aliu nëpërmjet këtij studimi do të saktësohen kostoja, traseja dhe koha për ndërtimin e hekurudhës. Ministri Aliu u shpreh se pas firmosjes së memorandumit të bashkëpunimit mes Shqipërisë dhe Kosovës, si dhe pas vizitës të bërë në Itali, kjo linjë hekurudhore po merr rrugën e saj.

Për qeveritë e Shqipërisë dhe Kosovës, hekurudha e planifikuar Durrës-Prishtinë ka edhe rëndësi gjeopolitike, jo vetëm ekonomike.

Kryeministri Albin Kurti pati deklaruar se linja hekurudhore Durrës-Prishtinë “është sa e një rëndësie ekonomike po aq edhe gjeopolitike, pasi ndihmon edhe rajonin, fqinjët tanë, me të cilët kemi të kaluar të përbashkët, por edhe do të ndajmë të ardhmen”.