Zjarri në pyllin e Pishporos në Fier, i cili vazhdon prej disa ditësh ka djegur rreth 500 ha pyll. Forca të shumta zjarrfikëse po punojnë për shuarjen e flakëve ndonëse era e fortë ka ndikuar në përhapjen e tyre.
Gazetari i Euronews Albania, Mariglen Bita i cili raportoi nga vendngjarja e cilësoi situatën apokaliptike, ndërsa theksoi se flakët e zjarrit vijojnë të djegin pyllin me pisha.
“Duket situata ka dalë jashtë kontrollit dhe në pamundësi për ndërhyrje nga ajri duhen shumë më tepër shërbime zjarrfikës në terren për të monitoruar situatën. Sipas asaj që tha kreu i emergjencave civile, helikopteri është në remont. Perimetri i zjarrit është zgjeruar dhe era e fuqishme që ka fryrë gjatë ditës ka bërë që zjarri të marrë përmasa të mëdha. Nuk përjashtohet që gjatë natës zjarri t’i afrohet banesave”, raportoi gazetari i Euronews Albania.
Kreu i emergjencave civile, Haki Çako i cili ishte sot në terren për të ndjekur situatën nga zjarri në këtë zonë, tha se ndërhyrja nga ajri është e pamundur pasi helikopteri ka qenë në fazë remonti, ndërsa shtoi se nëse situata vijon problematike do të angazhohen edhe me shume reparte zjarrfikëse për të siguruar perimetrin e zjarrit.
LEXONI GJITHASHTU:
- Vijon zjarri në pyllin e Pishporos/ Shefi i Emergjencave: Situata është e vështirë
- Publikohet videoja tronditëse, si nisi zjarri që i mori jetën 113 dasmorëve
