Policia në Belgjikë bastisi pronat e ish-komisionerit evropian për Drejtësinë, Didier Reynders, i dyshuar sipas mediave lokale për pastrim parash.

Për vite me radhë, Reynders ka blerë bileta lotarie përmes Lotarisë Kombëtare Belge, një organizatë të cilën ai e mbikëqyri kur ishte ministër në periudhën 2007 – 2011.

Ai dyshohet se mori pjesë në lojërat e lotarisë dhe depozitoi fitimet, tashmë të pastruara, në llogarinë e tij personale.

Mediat lokale raportojnë se hetimi mbi ish-komisionerin zgjaste prej muajsh, por hetuesit kanë pritur deri ditën e diel, kur dhe skadoi imuniteti që i garantonte posti i rëndësishëm në radhët e Komisionit.

Një nga pronat e kontrolluara nga policia ishte pronë private e Reynders, ndërsa vetë ish-shefi i Drejtësisë evropiane u mor në pyetje deri në orët e vona të së martës.