Holanda mbetet pa gaz pas refuzimit për të paguar në rubla

“Gazprom” po përgatitet të mbyllë rubinetet e gazit për Holandën, pas refuzimit të vendit për të paguar në rubla.

Kompania holandeze “GasTerra” ka sqaruar në një komunikatë se pagesa në rubla nuk mund të bëhej pasi përbënte shkelje të sanksioneve të vendosura nga BE.

Bllokimi, i planifikuar për të martën, prek rreth 2 miliardë metër kub gaz të koncentruar deri në tetor.

Kompania daneze e gazit “Orsted” ndodhet në të njëjtën situatë. Afati për të paguar në valutën ruse skadon të martën dhe bordi i saj e ka bërë të qartë se do të vazhdojë pagesën në euro. Kontrata e saj me “Gazprom” mbulon shumicën e gazit të konsumuar në Danimarkë.

Nëse Moska i përmbahet kërcënimeve, Danimarka dhe Holanda do t’i bashkohen Polonisë, Bullgarisë dhe Finlandës, vende të cilave “Gazprom” u ka ndërprerë furnizimin me gaz pasi kanë refuzuar të paguajnë në rubla.

Pas valës së parë të sanksioneve të Perëndimit, presidenti rus urdhëroi një dekret që pagesat për gazin të bëhen në rubla, për të forcuar sovranitetin e Rusisë, me pretendimin se SHBA dhe BE po e përdornin sistemin financiar si armë.

LEXONI GJITHASHTU

• ‘Më i liri në Europë’, Serbia shpall marrëveshjen 3-vjeçare të gazit me Rusinë
• Rusia i ndërpret Finlandës furnizimin me gaz