Homazhet, drejtësia dhe politika nderojnë gjyqtarin Astrit Kalaja

Në Pallatin e Kongreseve po mbahen homazhe në nder të gjyqtarit Astrit Kalaja i cili u vra 2 ditë më parë në Gjykatën e Apelit.

Prokurorë, gjyqtarë dhe përfaqësues të sistemit të drejtësisë kryen homazhe në nder të kolegut të tyre të vrarë në krye të detyrës.

Gjithashtu përfaqësues të qeverisë dhe politikës, që nga kryeministri Edi Rama, presidenti Bajram Begaj, ministri i Drejtësisë Besfort Lamallari u bënë pjesë e homazheve që nisë në orën 09:00-11:00.

Vizitat e ngushëllimit për gjyqtarin e ndjerë në qytetin e Shkodrës do të bëhen në shtëpinë funerale “Bushati”, këtë të mërkurë më datë 8 tetor 2025 prej orës 14:00-16:00.

Përcjellja për në banesën e fundit do të bëhet në orën 16:00 në Stom-Golem në Shkodër.

Gjyqtari Astrit Kalaja u vra me armë zjarri dy ditë më parë në sallën e gjyqit të Gjykatës së Apelit.

Elvis Shkambi qëlloi me tre plumba gjyqtarin menjëherë sapo dha vendimin në disfavor të tij për një çështje prone duke i shkaktuar vdekjen.

31-vjeçari qëlloi me armë zjarri edhe ndaj 2 personave të tjerë në sallën e gjyqit, me të cilët ishte në konflikt pronësie duke i lënë të plagosur.

Pas arrestimit të autorit të vrasjes, Elvis Shkambi, në pranga lidhur me ngjarjen e rëndë janë vënë edhe xhaxhai i tij, Gjon Shkambi, si dhe punonjësi i sigurisë i Gjykatës së Apelit Tiranë, Banush Koxhaj.

Begaj dhe kreu i SPAK, Altin Dumani takim kokë më kokë në homazhet për gjyqtarin pic.twitter.com/h5uWkew2q6

— Euronews Albania (@EuronewsAlbania) October 8, 2025

LEXONI GJITHASHTU:

• Vrasja e gjyqtarit Astrit Kalaja, Gjykata e Sarandës pezullon proceset gjyqësore
• Vjen reagimi i parë nga familjarët e gjyqtarit të vrarë Astrit Kalaja: Ishte dritë