​Hoti: Shumë shpejt datë të re për takimin në Uashington

Kryeministri i Kosovës, Avdulla Hoti pas kthimit nga Brukseli ka mbajtur një konferencë për shtyp, ku deklaroi se, nuk ka alternativë tjetër për zgjidhjen e mosmarrëveshjeve me Serbinë përveç dialogut.

Hoti bëri të ditur se ka rënë dakord me të dërguarin e posaçëm të Donald Trump për një datë tjetër takimi në Shtëpinë e Bardhë, ndërsa gjithashtu po përgatiten për Samitin e Parisit, ku do të ketë dialog me ndërmjetësimin e Francës dhe Gjermanisë.

“Besojmë thellë që dialogu nuk ka alternativë. Këtë qëndrim e kam paraqitur edhe para zyrtarëve të BE, është në interes të Kosovës që ky proces të mbyllet sa më shpejt”, deklaroi kreu i qeverisë së Kosovës.

Z. Hoti nënvizoi se, takimi në Uashington do të jetë me axhendë të karakterit ekonomik, ndërsa për Samitin e Parisit tha se shumë shpejt do të bëhet publike axhenda.

“Kam pasur bisedim me Grenell. Pas diskutimeve jemi dakordu që ta shtyjmë për një datë sa më shpejtë. Axhenda e takimit mbetet e njëjtë, që t’i japë shtysë dialogut përmes një axhende të zhvillimit ekonomik”, shtoi ai.

“Tani janë duke u bo arranxhimet e fundit për Samitin e Parisit. Jemi të nderuar që kemi një fokusim të madh të kancelares gjermane dhe presidentit francez. Besoj që shumë shpejt axhendën për samitin do ta kemi publike”, përfundoi Hoti.