Humbja e opozitës, Belind Këlliçi: Duhet analizë, edhe ne kemi përgjegjësitë tona

Kryetari i Forumit Rinor të Partisë Demokratike, Belind Këlliçi thotë se për rezultatin e zgjedhjeve kanë përgjegjësi të gjitha strukturat e partisë dhe për të duhet bërë një analizë e thellë.

Përballë zërave kundër që kanë dalë ndaj kryetarit Lulzim Basha, Këlliçi thotë se kushdo që mendon se ka një platformë alternative mund ta provojë në garën për kryetarin që nis në muajin korrik.

Në një intervistë për Euronews Albania Këlliçi theksoi se këtë çështje e zgjidhin demokratët me proces zgjedhor brenda partisë dhe jo “individët”.

“Në muajin korrik do kemi procesin e zgjedhjes së kryetarit, të gjithë ata që mendojnë se me alternativën, platformën e tyre mund të bëjnë diçka më shumë […] të paraqiten në garë, dhe të garojnë, e vendosin demokratët këtë dhe jo disa individë, e rëndësishme është që të kemi një proces të besueshëm, një proces model dhe të vijojmë përpara,” – tha Këlliçi duke shtuar se momenti kërkon ulje të toneve dhe analizë të detajuar.

“Më pas do jetë momenti për të mbajtur përgjegjësitë, pasi ne kemi qenë të gjithë ekip,” – shtoi ai.

Për sa i përket “ftesës për bashkëpunim” nga kryeministri Edi Rama, Këlliçi tha se ajo nuk është e sinqertë dhe “është lojë për të shpërqendruar vëmendjen” nga problemet e zgjedhjeve.

Gjatë intervistës Këlliçi pretendoi se zgjedhjet ishin “një masakër” dhe se “i takon PD-së ta provojë këtë”.

“Nuk patëm dot zgjedhjet që donim, qetësinë që donim, procesin model […] në 2021 Shqipëria duhet të mbante zgjedhje model, por për mua është kryer masakër elektorale,” – u shpreh Këlliçi.

“Në momentin që flasim PD po përgatit një dosje që do t’ia paraqesë autoriteteve përkatëse shumë shpejt,” – tha Këlliçi teksa u shpreh skeptik për drejtësinë.