Hyri brenda dyqanit për të vjedhur, arrestohet në flagrancë 36-vjeçari në Mamurras

Vjedhja e një dyqani në Mamurras u parandalua nga policia falë ndërhyrjes në kohë të shpejtë te efektiveve te cilët ndaluan në flagrancë 36-vjeçarin me inicialet A.M.

Ai sapo kishte hyrë brenda dyqanit, i maskuar dhe me kapuç, duke mbajtur në dorë një çekiç, send me të cilin kishte thyer xhamin e derës.

Atij ju vendosen pranga dhe akuzohet për 3 vepra penale; vjedhje e mbetur në tentativë, sigurim i kushteve për vjedhje dhe shkatërrim prone.

Njoftimi i plote i policisë

“Shërbimet e Komisariatit të Policisë Kurbin, pas marrjes së njoftimit se një shtetas i maskuar po tentonte të vidhte në një dyqan ushqimor në Mamurras, kanë organizuar punën dhe janë nisur menjëherë drejt adresës së dhënë.

Si rezultat i veprimeve të shpejta, shërbimet e Policisë kanë kapur në flagrancë në dyqan, autorin e dyshuar, me maskë dhe me kapuç, duke mbajtur një dorë një çekiç me të cilin dyshohet se kishte thyer xhamin e derës së dyqanit.

Nga veprimet hetimore u identifikua autori i dyshuar i vjedhjes, shtetasi A. M., 36 vjeç, banues në Mamurras, i cili u arrestua në flagrancë nga specialistët për Hetimin e Krimeve të Komisariatit të Policisë Kurbin, për veprat penale “Vjedhja”, mbetur në tentativë, “Sigurimi i mjeteve për vjedhje” dhe “Shkatërrimi i pronës”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Lezhë, për veprime të mëtejshme”, thuhet në njoftim.