I akuzuar për kultivim dhe prodhim të narkotikëve, arrestohet 46-vjeçari në Vaun e Dejës

Një 46-vjeçar i shpallur në kërkim ka rënë në pranga në Vaun e Dejës, pasi akuzohet si bashkëpuntor për përshtatjen e dy ambienteve për kultivimin e bimëve narkotike, me ndihmën e llambave, në fshatin Barbullush.

Specialistët e Seksionit për Hetimin e Krimeve në Komisariatin e Policisë Vau i Dejës ndaluan shtetasin Gj. G., 46 vjeç, banues në fshatin Barbullush, i shpallur në kërkim në kuadër të operacionit të koduar “Neonët 5”.

Nga këto dy ambiente, disa javë më parë, u sekuestruan 583 bimë narkotike kanabis, rreth 7.5 kilogramë kanabis dhe 307 pajisje elektrike që shërbejnë për kultivimin e bimëve narkotike.

Gjykata e Shkallës së Parë e Juridiksionit të Përgjithshëm Shkodër i ka caktuar masën e sigurisë “Arrest në burg” për veprat penale: “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike ose impulseve telefonike”, të kryera në bashkëpunim.

Vijon puna për kapjen e shtetasve të tjerë të shpallur në kërkim, ndërsa materialet procedurale iu referuan Prokurorisë së Shkodrës për veprime të mëtejshme.