I dyshuar për grabitjen e miliona eurove në Rinas dhe vrasjen e vëllezërve Haxhia, 10 mijë euro shpërblim për kapjen e Talo Çelës

Policia e shtetit bën me dije se ka vënë në dispozicion 10 mijë euro për këdo që do të japë informacion të vlefshëm që do çojë në lokalizimin dhe kapjen e të shumëkërkuarit Talo Çela, i dyshuar për disa ngjarje të rënda kriminale.

Talo Çela është person i shpallur në kërkim kombëtar dhe ndërkombëtar, pasi Gjykata për Krimet e Renda Tiranë i ka caktuar masën e sigurisë “Arrest në burg”, për veprat penale “Vrasja e punonjësit të policisë” kryer në bashkëpunim, mbetur në tentativë, “Vjedhja me armë e kryer në bashkëpunim”, në kuadër të grupit të strukturuar kriminal dhe “Vrasja me paramendim, kryer në bashkëpunim”.

“Ky shtetas është autori i dyshuar i ngjarjes së datës 09.04.2019, ndodhur në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, kanë arritur të vjedhin një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje.

Gjithashtu, ky shtetas është i dyshuar si autor i ngjarjes së datës 27.04.2020, në lagjen 14/1 Durrës, në vendin e quajtur “Tregu i makinave”, Shënvlash, Durrës, ku u vranë me armë zjarri 2 vëllezërit Haxhia”, bën me dije policia.

Për çdo informacion që i shërben kapjes së këtij personi, policia ka vënë në dispozicion numrin e celularit 069 41 06 823, si dhe në numrin pa pagesë 112 apo në Komisariatin Dixhital, duke iu garantuar anonimat të sigurt.

Lexoni gjithashtu:

Tritol shtëpisë së Talo Çelës, njeriut më të kërkuar në Shqipëri pak kohë më parë i vranë vëllanë

Ekskluzive/ Zbardhet vrasja e vëllait të Talo Çelës