I hapet rruga qeverisë në Gjermani, SPD miraton marrëveshjen e koalicionit

Partia Social-Demokrate e Gjermanisë (SPD) ka miratuar me shumicë dërrmuese marrëveshjen për formimin e një koalicioni qeverisës me aleancën konservatore CDU/CSU. Sipas rezultateve zyrtare, 84.6 për qind e anëtarëve të SPD-së votuan në favor të bashkëqeverisjes me kristiandemokratët, duke i hapur rrugën formimit të kabinetit të ri qeveritar.

Kryetari i SPD-së, Lars Klingbeil, është konfirmuar nga presidiumi i partisë si zëvendëskancelar dhe ministër i Financave në qeverinë e re. Vendimi u mor njëzëri dhe e vendos Klingbeil në një rol kyç në drejtimin e përfaqësimit social-demokrat në kabinet.

SPD-ja, ndonëse pësoi humbje të ndjeshme në zgjedhjet e fundit federale, do të përfaqësohet me shtatë ministra në qeverinë e re. Lista përfundimtare e emrave të propozuar nga kjo parti do të bëhet publike deri të hënën.

Kjo marrëveshje e re e koalicionit i hap rrugën formimit të qeverisë së përbashkët CDU/CSU–SPD nën udhëheqjen e kancelarit të ardhshëm Friedrich Merz. Zgjedhja e Merz-it dhe betimi i kabinetit në Bundestag janë planifikuar për të martën e ardhshme.

LEXONI GJITHASHTU:

• Anëtari i CDU-së: Ministri i ri i Jashtëm gjerman mbështetës i madh SPAK-ut
• Merz njofton për marrëveshjen për Qeverinë, synon të bëhet kancelar në maj