Një 49-vjeçar është arrestuar nga policia në pikën kufitare të Qafë Thanës pasi tentoi të fuste në Shqipëri, 500 l naftë të dyshuar të kontrabanduar.

Sipas policisë, 49-vjeçari, i cili po drejtonte një kamion nga Maqedonia e Veriut në drejtim të Shqipërisë, kishte fshehur në mjet disa bidonë plastikë të mbushur me lëndë djegëse.

49-vjeçari u ndalua për veprën penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”.

Materialet procedurale në ngarkim të tij i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.

“Në vijim të punës së intensifikuar të shërbimeve të Policisë Kufitare, gjatë sezonit veror, me qëllim parandalimin dhe goditjen e krimeve në kufij, në PKK Qafë Thanë, në hyrje të RSh-së, u kalua në vijë të dytë, për kontrolle të detajuara, kamioni me drejtues shtetasin R. G.. Në këtë mjet, u gjetën bidonë plastikë të mbushur me 500 litra naftë të pashoqëruar me faturë blerjeje.

Në përfundim të veprimeve procedurale për këtë rast, specialistët për Hetimin e Krimeve të DVKM Korçë bënë arrestimin në flagrancë të shtetasit R. G., 49 vjeç, banues në Elbasan, për veprën penale “Kontrabanda me mallra për të cilat paguhet akcizë ose me pezullim të plotë apo të pjesshëm nga detyrimet doganore ose të akcizës”. Gjithashtu u sekuestrua në cilësinë e provës materiale, bidonët me naftë”, thuhet në njoftimin e policisë.

LEXONI GJITHASHTU:

• Tentoi të dilte nga Shqipëria me 29 850 euro të padeklaruara, procedohet 43-vjeçari
• Tentoi të dilte me çantën plot me euro të padeklaruara, kapet në kufi 50-vjeçarja