“I pëlqejnë ushqimet pikante e të ecë buzë detit”- Mbreti i botës në shah në Durrës

Në Durrës u zhvillua Kampionati Europian i Klubeve të shahut ku mes shumë pjesmarrësve ishte edhe “mbreti” i këtij sporti, norvegjezi Magnus Carlsen. Euronews Albania tentoi disa herë për ta intervistuar, por 32-vjecari nuk pranoi. Ajo që mundem të sillnim, ishte rutina e tij ditore në këto 7 ditë të qëndrimit të tij në Durrës.

“Emri më i njohur në botë, sidomos për të apasionuarit pas shahut, prej ditësh tashmë ndodhet në Durrës.

Kampioni i botës, Magnus Carlsen po merr pjesë në atë që njihet si “Champions League”- a e shahut, në Kampionatin Europian të Klubeve të shahut, që për herë të parë po zhvillohet në Shqipëri.

Po këtu nuk e njohin shumë 32-vjeçarin norvegjez dhe duket se këtë e dinte edhe ai.

Erdhi nga Rinasi me autobusin e Federatës, duke refuzuar kështu pritjen VIP dhe shoqërimin me patrullë policie, siç refuzon gjithashtu të përdorë automjetin e tij për të lëvizur në Golem.

Shkon në këmbë nga hoteli ku është akomoduar drejt vendit ku mbahen ndeshjet, e po në këmbë preferon të ecë, sidomos buzë detit, ku e gjen duke shëtitur çdo mëngjes a drekë.

Dukshëm i pëlqen shumë deti, siç i pëlqejnë ushqimet pikante, na tregon shefi që gatuan çdo ditë për të.

Janë të paktë njerëzit që i flasin e më të paktë ata të cilëve u flet, e ndër të paktët ishim dhe ne.

I kërkuam një intervistë, të cilën me drojtje e refuzoi.

“Unë flas në tavolinën e shahut, aty më gjen”, tha duke shtuar se i pëlqente privatësia.

Dhe siç na tha, ai është aty, në tavolinën e katrorëve bardhezi duke shënuar me prezencën e tij historinë e shahut shqiptar, që për herë të parë priti atë, bashkë me 30 ish-kampionë botërorë”, deklaroi gazetarja e Euronews Kloida Gjuzi.