I shpallur në kërkim për trafikim të narkotikëve, arrestohet 35-vjeçari me qëllim ekstradimin drejt Italisë

Policia e Tiranës këtë të mërkurë ka arrestuar një 35-vjeçar, pasi akuzohet se ka qenë pjesë e një organizate kriminale që trafikonte lëndë narkotike. 35-vjeçari është arrestuar me qëllim ekstradimin e tij drejt Italisë.

Në kuadër të operacionit të koduar “Perugia”, është arrestuar shtetasi A. S., 35 vjeç i shpallur në kërkim ndërkombëtar, pasi Gjykata Penale e Peruxhias, Itali, i ka caktuar masën e sigurisë “Arrest në burg” për veprat penale “Organizata kriminale” dhe “Trafikimi i lëndëve narkotike”.

“Shërbimet e Sektorit të Forcës së Posaçme “Shqiponja”, në bashkëpunim me ato të Seksionit për Hetimin e Narkotikëve, bazuar në informacionet e shkëmbyera me Interpol Tiranën, për vendndodhjen e një shtetasi të kërkuar ndërkombëtarisht, kanë lokalizuar në rrugën “Dritan Hoxha” dhe kanë arrestuar provizorisht, me qëllim ekstradimin në Itali, shtetasin:     

-A. S., 35 vjeç, banues në Tiranë.

Interpol Tirana vijon veprimet procedurale, në bashkëpunim me Interpol Romën, për ekstradimin e këtij shtetasi, në Itali”, thuhet në njoftimin e policisë.