I vendos 12 kg eksploziv makinave të shokut, shakaja pa “kripë” burgos finlandezin

Një burrë në Finlandë është arrestuar pas një shakaje pa “kripë” që bëri ndaj një miku të tij.

I arrestuari rrezikon të përballet me 2 vite burgim pasi vendosi 12 kg dinamit në makinat e shokut të ngushtë.

Kryeinspektor në Policinë e Ostrobothnia Tony Rauma, zbuloi se burri në fjalë kishte thënë në dëshminë përballë hetuesve se e kishte vendosë lëndën eksplozive si një formë shakaje ndaj mikut të tij.

Megjithatë, pasi ai njoftoi mikun e tij për dinamitin e vendosur, ky i fundit nuk nguroi dhe telefonoi menjëherë policinë.

Uniformat blu evakuuan ndërtesat aty pranë për shkak të sasisë së madhe të eksplozivit.

Burri, nga zona Pedersore e Ostrobothnia, e Finlandës Perëndimore, u arrestua më vonë edhe pse ai deklaroi me forcë se nuk kishte ndërmend të hidhte makinat në erë.

“Përveç dinamitit, u konfiskuan edhe detonatorët”, njoftoi policia.

Policia ka përjashtuar çdo lidhje të mundshme me kryerjen e një akti terrorist dhe në përfundim të çështjes, burri u lirua me kusht.