I dërguari i Bashkimit Evropian për dialogun Kosovë- Serbi, Mirosllav Lajçak ka deklaruar sot se takimi i një nate më parë me presidentin serb, Aleksandar Vuçiç, ka qenë i gjatë dhe i vështirë, por i drejtë.
Sipas tij, palët janë pajtuar që të gjitha marrëveshjet e arritura në Bruksel duhet të zbatohen.
“Llogaris në sjelljen e përgjegjshme të të gjithëve, për të treguar përmbajtje për siguri dhe stabilitet. Dhuna duhet të shmanget”, ka thënë Lajçak përmes një postimi në Twitter.
Kjo deklaratë e tij erdhi pasi zyrtarë të Listës Serbe vendosën të largohen nga institucionet e Kosovës, pas vendimit të qeverisë për targat.
Vendimi për targat:
Qeveria e Kosovës ka nisur më 1 nëntor të zbatojë planin e saj në tri faza për riregjistrimin e makinave me targa të lëshuara nga Serbia.
Faza e parë përfshin qortimin e shoferëve, e dyta parasheh gjobë deri në 150 euro për ata shoferë, dhe e treta targa provuese.
Zbatimi i këtij plani pritet të përfundojë më 21 prill dhe, nga ajo datë, në qarkullim do të lejohen vetëm makina me targa RKS.
LEXONI GJITHASHTU:
- FOTO | Zyrtarë të Policisë së Kosovës në veri zhveshin uniformat
- Serbët vendosin të largohen nga institucionet e Kosovës
- Lista Serbe: Nesër del vendimi për largimin e serbëve nga institucionet në veri
